Lærartreff i utstillinga A Life in Print

Saman med Kodes formidlarar får vi innblikk i korleis Baselitz utforskar identitet og stadstilhøyring gjennom kunsten – og korleis eit elevbesøk i utstillinga kan forankrast i anna undervisning. Det blir også informert om museets tilbod for skuleklassar våren 2026.

Georg Baselitz (f.1938) er ein sentral og innflytelsesrik kunstnar, særleg i den tyske etterkrigstida. Han er kjend for ekspressive uttrykk og særeigen stil, der han ofte viser motiv som er opp-ned. Dette grepet byrja han med på slutten av 1960-talet for å utfordre tradisjonelle konvensjonar og tvinge tilskodaren til å fokusere på form og farge framfor motivets innhald.

Baselitz sitt kunstnarskap er nært knytt til tematikk som identitet, historie og det tyske traumet etter andre verdskrig. Verka hans er ofte prega av eit rått uttrykk, sterke kontrastar og deformerte figurar. Han er kanskje mest kjend for måleri i store format, men også grafikk og skulptur. Utstillinga A Life in Print viser om lag 250 grafiske verk lagd med ulike trykketeknikkar.